مذاكرة البرمجة خلال فترة الجيش

مقدمة

للمقدمين على فترة الجيش, للباحثين عن واسطة عشان للالتحاق بـ افضل مكان ممكن, للمحبطين نفسيا, فاقدين الأمل والرغبة في الفعل, المأنتخين استعدادا لفترة الجيش, اشارككم تجربتي.

فترة الخدمة

قرار اني اخش الجيش, كان عقبة في استمرار التعلم لكنها كانت خطوة مهمة عشان انجز, بس مخلتوش سبب عشان اسيب المذاكرة ... كنت مرن في التصرف وركزت على اني اجد حل ... بجانب التوقف المؤقت للمذاكرة, الجيش كان محتاج فلوس ... نزلت اشتغل في المكان الـ مش بحبه لانه المتاح والـ من خلاله اقدر اجيب فلوس بسرعة قبل الترحيل على الجيش.

قعدت قبل الترحيل الخاص بالجيش بـ 15 يوم فقط ... لاني كنت جمعت الفلوس الكافية ومكنش في سبب يخليني اكمل الشغل ده ... كنت كل يوم من الـ 15 يوم الـ قبل الترحيل بذاكر عادي ... ماعدا اليوم الـ 15 نفسه الـ هو قبل يوم الترحيل مباشرة.

لما دخلت الجيش اخدت معايا ورقة وقلم كنت بكتب في كل فرصة متاحة, اي فكرة تيجي على بالي اكتبها كنوع من إشغال الوقت وحافز لما انزل عشان استفاد من وقت الاجازة بالتطبيق ... كل 21 يوم كنت بنزل 7 أيام ... بذاكر منهم 5 أيام بمتوسط 4 ساعات, لاني فهمت ان وقت الاجازة هيمر سواء قررت استفاد منه او لا, وكمان مش بذاكر اليوم كله.

الموضوع كان صعب نفسيا لكن "من رأى نور الأجر هان عليه التكليف" ... بنهاية فترة الجيش الـ هي 1.5 سنة ... كنت مخلص برمجة موقع PythonEgy من الصفر بالكامل ... ومتوقف على ال Deployment ... أهم النقط من الكلمتين دول:

الموضوع عاوز قوة إرادة عشان تعمل حاجة خلال فترة الجيش, مش معناه ان عزيمة بره الجيش زي جوه  وان في تساوي في قوة الارادة, لكن تمسك لو حتى بـ 10% منها.

الورقة والقلم, كانت هي الطريقة لتحويل الإحباط والفتور, للتركيز على ايجاد افكار جديدة باستمرار, اتسلح بالصبر والإيمان بهدفك, ودايما فكر فيما بعد الجيش, وانك لما تطلع هتكون استفدت كتير باستغلالك ولو بـ 10% من الوقت, اقعد مع الناس وفك عن نفسك بس لما تتعود على الجو وتحس ان مفيش جديد ارجع للكراسة والقلم.

ناس كتير معندهاش هدف بعد الجيش, وكلهم بيقولو لما نخلص بس كنوع من الاجابة وخلاص, مفيش طريقة لتفادي النوعية دي من الناس, ومفيش داعي تحكم عليهم, اسمع منهم بس لا تناقش افكارك معاهم, وهتلاقي بردو اصحاب الاهداف ولكن قليلين, خليك واحد منهم.

مش كل صاحب هدف انسان شريف, سمعت دكتور كان بيضحك مع زميله وبحكيله ازاي انه كان بياخد قرار مع زملائه في المستشفى, بين وجبة الغداء الاول ولا يبلغوا اهل المريض أنه توفي, قرروا وجبة الغداء ...  وقابلت من هم في قمة الاخلاق.

كتير هتلاقي ناس انهت فترة الجيش او ليهم اعفاء, الناس دي نجحت وحققت الـ انت نفسك تحققه, وانت لسه بتقول يا جيش, متقارنش نفسك بيهم بعد اذنك, الشئ الوحيد الـ هتاخدو هو الإحباط, انت في امر واقع عليك التعامل معاه, والرزق مش بيجي بالعافية, ليس عليك إلا السعي, والتقسيم علي صاحب الارزاق, لكن متلومش نفسك لو قارنت نفسك بيهم غصب عنك, كلنا هذا الشخص, المطلوب منك تفوق نفسك بسرعة.

ياما قولت لسه 1.5 سنة جيش, وكتير مكنتش شايف ليها نهاية ... تاني فترة الجيش دي امر واقع, لما يعدي هتحسها ساعة, عشان كده متحاولش تكره حد او تشيل منه ... مش بقولك كون مثالي و متتعصبش, بقول متخدش الموضوع على صدرك, وخليك فاكر ان هو مجرد شخص في يوم انت وهو تتفرقوا ومش هتفتكر بعض تاني ... محتاج تعرف وتتاكد مهما كانت فترة الجيش في نظرك طويلة, فهي اسمها فترة وبتعدي.

انا زي زيك او أقل منك, مكنش معايا واسطة, ولا كان في حد بيقوم بالصرف عليا, انا وقعت كتير, وانهارت نفسيا اكتر, لكن كنت دايما بقف وأكمل, واكتب.

لو خلصت فترة الجيش وطلعت كملت طريقك وده الـ هيحصل عموما, انت أنسان ناجح ولو لم يؤمن بيك اي احد, وهتلاقي نفسك في غنى عنهم, خلي المقال ده معاك دايمآ اقراة هيفيدك في الفترة دي, ولما تخلص الجيش كلمني.

النهاية

" إن الشخصية الناجحة هي التي تتخيل النجاح الذي تريده "  علي الوردي

بالتوفيق يا بطل.